زرعت وجنيت - محمد الحويماني
ليت الورق يقرا وش اللي كتب فيه
و ليت القلم يدري وش اللي جرا به
ان كان ما تمسي ف صدري مشاريه
ولا اتضايق لو تضيق الرحابه
وا صوتي اللي عجزت الناس توحيه
غريب يوم اصوات غيري تشابه
البيت بيتك و المواري مواريه
لكن كبرت و لا كبر معك بابه
و الناي لو نقض جروحك ب أغانيه
جروح غيرك نقضتها ربابه
ما هو يتيم ان كنت انا اللي مغنيه
ولا هو فقير ان كان جرحي زهابه
و الغايب اللي يغري الشعر طاريه
ما قل قدره لو يطَول غيابه
كم لي و انا احث القصايد تخليه
حتى تلاشت رغبتي في الكتابه
و الشعر لو يفقد حروفه و اساميه
مدري وش اللي بعدها ينبغابه
احترت بين اعتب عليه و اراضيه
اخاف لا يجرح رضاه ب عتابه
أحيان أقول آبيه , و أحيان ماآبيه
الا ابيه و لو يبي لي عذابه
ي اللي تجونه دامني مااقدر آجيه
وصوا ذهابه لا يشح ب ايابه
و قولوا له اني من كثر ماني أغليه
اشرب سرابه و ارتوي من سرابه
و على كثر ماانسى اذا قلت ناسيه
دار الزمان و جاب عشقه و جابه
حنيت ل أيامه و ضحكت لياليه
قبله و بعده كل وقتي رتابه
ان لمت قلبي عاقبتني محانيه
وان قلت أبرضا عز نفسي رقابه
البارحه كنت اكسر الروح و انهيه
كان الورق ارض و عيوني سحابه
زرعت مااحبه ولا عاد لي فيه
و جنيت احبه لو يطول غيابه