رابع إخواني - محمد الدحيمي
برق برق المشيب ولا لقيت الاّ اربع ٍ تختال
سوالف غربتي وطعون فقري همي احزاني
يخلف الله يا عمر ٍ قضيته طرقي ونقّال
تكاثر فيني الدنيا وطن من بين الأوطاني
على ذا الحال ذي عاشر سنه قد لي على ذا الحال
ادوج خطوتي واقول : علّ الهم ينساني
ولا ادري الاّ وهو في هجعة الغدراء يدقّ البال
تقل ويّاه عذال ٍ تدلّه وين عنواني
صبرت وقلت : كفارة ذنوب إلين صبري طال
وتهاوني عدوي واهملوني كل خلاني
خطاي اني سنين اسمع وصايا العاذل اللي قال :
تسلّى وش من الدنيا بتآخذ غير الآكفاني
وانا بحروة حلاها جرعتني المرّ باالفنجال
وانا ماسمّني غير اني المظلوم والجاني
احد مثلي نشب مابين قلبه والفكر غربال
إليا اشتد الخصام يجيك كل ٍ يلعن الثاني
احد مثلي حرق ثوبه واخذ ثوب القصيد سمال
وغدت بي هقوتي واحلى قصيدي مات بلساني
ذبحني حظي اللي ماقدر مره ينط ّ الجال
تردى لين سولف بي لسان فلان وفلاني
كذا ياالحزن ؟! ماكنّا تخاوينا سنين طوال
انا وياك في الدنيا : فضولي طاح بآناني
كذا ياالحزن ؟! ماكناّ تعاهدنا وحنّا اطفال
نوفي بعضنا واللي يخون العهد خواني
تنثرني حزن فاجر حزن كافر حزن قتال
حزن خلى شموخ اقصاي يلعن رحمة الداني
وتعيرني بفقري والفقر ماعيب الرجال
انا وش ذنبي ان جار الزمن والوقت عيانّي
معودني يصيرون اصدق الاصحاب لي عذال
وعلّمني اشوف اصدق وفا بوجيه عدواني
انا ياالحزن ما خذت المراجل غترةٍ وعقال
وانا عون الخوي ومزبن ٍ للضيف والعاني
انا من صغر سنّي عشت يانزال يارحال
ابوي مربّي اخواني وانا اللي الوقت رباني
تقول امي : ( قبل تولد توفى لي ثلاث عيال)
لابو حظٍ تكاثر فيني اصبح رابع اخواني
الا يالله تعجلّ بالفرج يا مفرّج الأحوال
اخاف أموت وحداني مثل ماعشت وحداني
على أيّة حال ياعاشر سنه مرت على أيّة حال
تكاثر فيني الدنيا وطن من بين الآوطاني