آخر الصعاليك - محمد الدحيمي
ضقت !! قلت الشعر للضيقه علاجي
ردني وأوسع فجوج الكون ضيقه!
وشايبي قال : أول الذلّ الهجاجي
والغدر طعنة رفيق ٍ من رفيقه
لاغًدى صافي الخماسين العجاجي
إدع : يالله حلّها بأيّة طريقة
شف بريق النوض يزبن ليل داجي
تحسبه لولا الدجى يوضح بريقه؟؟
ورحت أزيّف للحزن فلّة حجاجي
مثل من يطفي الحريقه بالحريقه!
ماتعيّب ( بيضة الديك ) الدجاجي
والحقيقه كان ودك بالحقيقه
ما أجهل من اعمى سرى بإيده سراجي
غير مبصر دلّه الأعمى طريقه!
راعي ٍ لاشعب لا ماء لا نعاجي
جاء يطيق الصبر والاّ وش يطيقه ؟!!
ظامي والبير صافيه الهماجي
كلما اضنكه الظما يشرق بريقه!
وش لك وللحيد يابيت الزجاجي ؟
ووش لها والهجوله نفس ٍ رقيقه؟
قدّر الله جاء لأبو تسعه ( خداجي)
والخداج بعرفنا ماله عقيقه!
فارس ٍ ماهوب ( بعقاب العواجي )
لكن امست كل نوتٍ له عشيقه!
مايغلّي بيعة الرخص الحراجي
والجديده دين في ظهر العتيقه
لعنة الجغرافيا هالك وناجي
وطعنة التاريخ وجروح ٍ عميقه!
إزدواجيه ولا نيب إزدواجي
حافظٍ علمي وموثقه بوثيقه
صعلكة والصعلكة نزعة مزاجي
وسمّني : آخر صعاليك الخليقه!!
قال ابوي :- الضيق تاليه إنفراجي
وقال جدي :- تالي الأفراج ضيقه!