ماهي وراء حد الحدود الا على حد الحدود - محمد بن مريبد العازمي

البارحه ياللي وجودك جود وغيابك جحود
يااللي هل النمات لو يرمونها يخطونها

يااللي شمال من الخبر شرق(ن)عن رمال النفود
يااللي تعنيني لها اقدامي واجي لعيونها

ماهي وراء حد الحدود الا على حد الحدود
البحر كله من وراها والسهل من دونها

البارحه مابين ريحانك ونفحات الورود
هبت هبوب الشوق والذكرى تميل غصونها

احييت فيك الطاري المعهود والحبل معقود
وغنيت لك منظومة(ن) طاروقها ولحونها

قصيدة(ن) ياكثر ماجاني عليها من الردود
وياكثر من غنى لحنها بعد مايقرونها

ماهيب من طرق الرومنسيه ولاقرق الهنود
ابيات تبقى للزمان ولونها هو iiلونها

ماألذ من طعم الغلا ولاأمر من طعم الصدود
يالله عسى ربك يعين وجيتك ياعونها

يومن من ايام السنه وليل(ن) تغطيه الرعود
سريت لي في ليلةٍ والناس مايسرونها

اسرجت للمسراح خيل وحن للمرواح ذود
وعدتني الشيمه وخوف الناس لايعدونها

اللي تقيدني وانا يابو فهد مالي قيود
ولازال تطعني وانا لازلت اشيل طعونها

اللي مشكل حزبها فيني ولاحزب الليكود
فديتها عسى هل النمات مايدرونها