كيف أطفي الريح ؟! - مساعد الرشيدي

كيف أطفي الريح بثيابك وكيف اشعلك
كيف اتنثر على جمرك وكيف احتويك

نقضت ليل الحرير وجيت ماانت لهلك
سمّيت باللي فتني بك وقلت ابتديك

هذا اول الدرب او هذا الطريق اولك
جيت آتوقّا عذابات المدى 00واهتديك

شوقي مسافة وهمساتك مدار وفلك
ان ماظميتك غلى 00ياعلني ماارتويك

إيه اعرفك واعرف اني من غلاك اجهلك
مرات اضمّك واخاف اني مشبة عليك

مرات اشوفك بنفس الوقت واتخيلك
وانشد كفوفي عن اخر سالفة من يديك

أعنّ لك لو تصّب الموت 000واتهيّلك
واجوع لك وآتمنى خنجرك واشتهيك

ماقلت لك عمر سيف العشق مايقتلك
ماتشوفني حي قدامك وانا اموت فيك

اشتقت لك قبل اجيك وجيت واشتقت لك
البارحة طول ليلي بين هذي 00وذيك

مليت جمر انتظارك واستحيت أسألك
واحسبتني ما بعد جيتك وفكرت اجيك

اثرك بقلبي من البارح وانا استعجلك
واثري نسيتك من الفرحة وقمت احتريك