الفقيرة - ناصر القحطاني
يسعد صباح الفقر ياللي تذمينه
في ذمتي منتي من الفقر معذورة
ما شلت هم الرغيف اللي تشيلينه
كل الهموم لسواد العين مذخورة
منتي فقيرة تقولين اليسر وينه
ياقطعة السكر من الملح ميسورة
من علم الجوري انشودة بساتينه
من هز ريش النعاس اللي كسا حورة
من ذكر الخيزران اللي نسى لينه
من جدل الليل لين اختال ديجوره
سلسالك الفضي اصلا لو تزمينه
ماراحت اكثره عقود الماس مغرورة
والازرق الرث ياملحه ويازينه
ابهى من ارض نهار العيد ممطورة
مستورة الحال بس القاف تغيرينه
ليه اتنحى و اخلي الحال مستورة
والله لا اغني لفقر غنت سنينه
لين ايسر المترفات تموت مقهورة
قالوا لي ان الجديل اللي تربينه
معه تربين حلم فاحت عطوره
قالوا بذاك الركن سر تخبينه
ومرايه من رداة الحظ مكسورة
لا ينكسر مثلها الخاطر وتشقينه
تمنظري في المرايه حي هالصورة
مذكور جرح ورى الاضلاع تخفينه
وتحت المخدة رسالة عشق مذكوره
اثر الهوى جاء يسوق الشوق بيدينه
غصن جفا اليابس وزف عصفورة
يامن يكون الحبيب اللي تحبينه
ياللي بوجه الليالي ثروه وثورة
وقت مضى ملمس اللعبة تمنينه
واليوم خضر القلوب العاب منثورة
الحزن ليه العيون السود في عينه
والبحه اللي ترد الروح مذعورة
فقر ستير ولا ازكى من رياحينه
ولا نعيم فضوح تغرق سهوله
والميت اللي يبي دعوات حيينه
كنتي وصاته ونزفه وآخر شعوره
يازمة الغيم و رخياة هدب عينه
ما قلت لك ما انتي من الفقر معذورة