المكان - ناصر القحطاني

خذا اللي تطلبه..مادمت اخوي العازم الجازم
لكن ان شفت دمعي..شف لنا شي يسلينا

فتى أحلام..هنا..كان يتغزل في فتاة احلام
خطفها بين حور البحر واغلاها من المينا

وجاب لها بساط الريح..قالت للغلا قدام
ولا نحتاج يامخلوق مخلوق يوصينا

انا ذاك الفتى الصب وهي اجزل واكرم الاكرام
من اللي مد عمره صدق ف اولنا وتالينا؟

دقيقة من دقايق ها المكان تساوي مية عام
هنا..ساعاتنا ما كانت تلحق ثوانينا

هنا ياما تعاهدنا..هنا ياما غدينا اخصام
هنا ياما تعاتبنا..هنا ياما تراضينا

هنا كنا نصيح وتحتوي صيحاتنا الانسام
لطيفة كنها لامن تجادلنا تهدينا

هنا كان الحمام يطير لكن لاوصلنا حام
يحسب أنا من السرب وهو اللي كان ناسينا

هنا طلنا حضن نجد وهواء الطايف وتمر الشام
وجوز الهند واعذب دجله وسكر قصب سينا

ماأرقه من مكان..الله يوم انا نجيه هيام
عطاشى جايعين وكان يطعمنا ويسقينا

نجيه بلا هدايا والخفايا حسبة الأيتام
ونعود بلا خفايا والهدايا في مخابينا

ولو ينطق..تفجر به نهر كله ذهب وانغام
وزم الفل والريحان والنرجس حوالينا

نحبه كثر ما طشنا وقسمنا فضاه اقسام
لا ماسينا واسامينا وامانينا واغانينا

كثر ماضمنا وايامنا ماهي من الأيام
ودنيانا شبر في شبر تضحك بين ايادينا

على وضح النقا..وضح النقا..وضح النقا اللي دام
وكن الكون باللي فيه ما والله يعنينا

توادعنا وودعنا المكان وحارت الأقدام
ولا ملت شفاه افواهنا ترديد اسامينا

ايلين الدمع طاح وطاح معه الشال والبسام
ياليتك تدري بذيك الدقايق وش حصل فينا

ورى دمعتك سالت..وانت اخوي العازم الجزام
أنا ماقلت لك دور لنا شي يسلينا؟