وجه الطموح - ناصر حطاب الدهمشي
يا مبحره قبل أعرفك أعرف إنسان
فيني نما عايش على ذكرياتِه
تشكَّلت فيه الأماكن .. و الأزمان
غطَّت على وجه الطموح إبحياتِه
جسمه نحيل و شايل بصدره أطنان
من معضلاتٍ إستباحت بذاتِه
غريب شيَّد من غياباته أوطان
تحفظ له إسمه قبل ياصل مماتِه
بيديه كون .. وداخل إعيونه أكوان
تحكي مسافات الرحيل و شتاتِه
دنياه تسرق من مشاويره الحان
و يشيلها صوت الحنين بشفاتِه
جا يرسمه .. لكن مجاهيم الألوان
خانت يديه و صورت له رفاتِه
تايه و لا يعرف طريقه إلى الآن
يمشي ويسأل هالزمن عن جهاتِه
وتْمرّه أحلامه سريعات و سمان
و الغيم فوقِه مندهش من ثباتِه
إن طاح حلْمِه .. صارت آماله أركان
وإن غاب شوفه .. صارت أرضه عصاتِه
هالآدمي مثل الجبل لكن أحيان
أحس بإن الغيم ماخذ سماتِه
لكن .. و ربِّك لو غفت فيه الأحزان
ما نام عزمه وأنتِ أعظم خواتِه