أضداد - ناصر حطاب الدهمشي
وش حيلتي لا غشتني صورتك بالمنام
في ليلة ما تعذر العاشق المستهيم
فيها التَّوجِّد على شوف الحبايب حرام
و الشوق فيها على روس الثواني مقيم
مليت اشوفك على غصن امنياتي حمام
لا هزَّه الخوف ... شلَّع و اقتفاه العتيم
اسمع هديله يرتِّل للحياة السلام
يوصي غيابه ... يكون إفاقدينه رحيم
مثل الأصابع مكانه في غياب العظام
ماله تفاصيل وشكله لو وصفته دميم
حل المسا وامتلا حلمي سراب وغمام
وامسيت ما بين قربك وابتعادك اهيم
شاعر تجر المواقف من عيوني كلام
أقسى من الفقد صمتي في ملامح يتيم
اشبه حنين اليتامى لارتشاف الهيام
لا مرَّوا بشارع كل عابرينه حريم
فيني من الهاربين البهذلة وإنهزام
فيني من الثابتين الإنتصار العظيم
فيني من الليل حزن يستثير الظلام
فيني من الصبح نور منكسر بي قديم
أضداد كل المعاني في عيوني تنام
زي ما تنام الطفولة في عيون الفطيم