الموسميه - ياسر التويجري

يابو(فيصل) لاتكثرها على القلب الصويب
خوتك تاج على الرأس الرفيع مقدرة

طردة المقفيين عيب وتركه الغاليين عيب
وأنت غالي جيت لمي عز وعتاب وشره

مالك الا طلقه الحجان والصدر الرحيب
وأنت عطني من بياضك شئ غير المعذرة

المهلهل لو بغى بالغدر ماخلا كليب
وأنا والله مثل سالم ماتركتك مسخرة

مير تدري ازهم الراعي وكثر بالحليب
خلنا ندهن سواد القلب وألا ندمرة

خلفتاً ماهيب ملحا لاتهمك يالصحيب
الحلا لو قصرت به الجزالة تجبره

أشرب أشرب وأنا فعل الكآبة والكئيب
والله أن تأخذ علومي جل ماهي منكرة

الظروف اللي حدتني للمبدا شق جيب
قسمتاً تمطر على قلبي هجوس وتغمرة

أتذكر باذر الريضان وقشوع الشعيب
والحيا ومداعبات الديم ولا ضم زهرة

والديار اللي شمال عنك الرجل اللبيب
نفد وألا خضب وألا سيح وأن كان وعرة

أتذكر مشيتي فيها وأنا ماني غريب
حافظاً كل المعالم من حصاة وشجرة

مع رجال يرادون العزم من جم القليب
لاغدا بالجو من خير المحادين غبرة

زينها والعلم جانا من حمود ومن هديب
والحبارى فالمذاري بالطيور مخمرة

ومعك زودً يالسنافي عن فلاح وعن ربيب
أشقر ماهوب شامي لا ولا من انقرة

فرخ ماجلب على الصفاة الهم قليب
نقوتي وأنا انتقيته بين خمسة وعشرة

وافياً وقياس طوله منه لعروضه قريب
وأن قفيته كن لونة مثل لون الحمرة

صافياً لو كان مابه كبر حبات الزبيب
دقتين في غواطيها لو أخر بظهره

يعني من اللون معجب او نقول انه عجيب
تنبهر لا شفت قفوة وتحير بنحرة

كن ضربات السهوم اللي بصدرة مسح شيب
ساطيات بأخر العشرين في قذلة مرة

أقحباً وراسة مسطح مثل رأس ام الجنيب
وأن عطاك الجنب ماله غير مدور منخرة

لاخذا عنه اللقوف اللي يدور فيه عيب
كنه اللي شاف وجهه يالسنافي يقمرة

كاشفاً كنه قطاعه الحليب من الرويب
وكن عينه مع بياض الخد فتحه مسكرة

..عاتقه الله واكبر ياعليم ويا رقيب
أطول من الشبر واقصر قفلتين من الذرة

لانطحته بزوطياً تو ماعلق نقيب
أمتلهف من كميلة كنه تحك شعرة

وأن قفيته يابو(فيصل)كنه قفايه طبيب
عقب حاول بالمريض وعجز عنه وخسرة

محدبله لامديون ولا مستصيب
شارة للسبق وشئ تخبرة

أتذكر قبل مدة عن أبو عادل شبيب
يوم طيرة صلف تذكر قبل يفعل نحقرة

ويوم هدة وش تبين ؟؟غير صفق مع وحيب
أنشلع كتله من القرطاس والعج دفرة

ويوم حول والله أنه مجرم طاغي وريب
كنه هوايه مظلي عقب خانه منشرة

ويوم جينا الطيرق اللي وش لقينا به يصيب
غير طوله الجناح و زور وحداب ظهرة

والله أني ماطمعت بغير ذولي يالصحيب
غير هجر لانقلته كن كفه مجحرة

مسبل ريشة عليه تقل مجدولة سبيب
والا ثوبة للكويت اللي تحب الفشخرة

قاطعً مافيه شئ مايستطيعك تستجيب
والله انه في الحلالة خير شئ تسكرة

شوفته وهو يتفلا بالخلا عند الجويب
فالمضحى صيدة أربع عدال مصطرة

الله اكبر يأهل الارباح والكسيب
الرهيب راعي المليار والا فووق ماجبت خبرة

والوكاد أني من الويلان مردياً مصيب
والريال اللي يجيني ما أحشمة أقهرة

أدفعه بدناه شئ من دون تحسيب
والله الرزاق والا الناس ماهيب ثمرة

القصيدة خلصت ياصااحبي والعد غيب
والنشر ما أحب اغسل قصيدي وأنشرة

لاتركت تنعرض فيديو كليب
كيف أبطلع في قناه كل أبوها مبزرة

رقص وأغاني مجون وفسق والمضمون خيب
ومن نصر ربي ترا ربي رحوم ينصره

أسئل الله الواحد الفرد المجيب
أن يوفقنا ويهدينا وأنا نشكره