الرنج - تركي الديحاني

راكب اللي لا مشى يقطع الخط الطويل
صاحبه مرتاح والقاع طاويها طوي

لا مشى فوق الثرى واستوى ماله مثيل
ان طلع طلعة صقر وان نزل يهوي هوي

ميزته ( فل ابشن ) ورافعٍ راس الكفيل
الزباين وسط عرض الوكاله تلتوي

وان دعست سليتره طار يم نجمة سهيل
وان نخيته جاك جيّة شجيعٍ وحموي

هيبته مثل ابلجٍ لايكل ولا يميل
جامعٍ فعل الضياغم وصيت ابن جلوي

وكن ضفه للمسافه مثل ضف الجديل
في يدين الفهلويّه لا شافت فهلوي

ولايسجّل دفتره بسم رجالٍ بخيل
ولايسوقه خبل قومٍ ابْيته منطوي

مايسوقه غير قرمٍ مثل ذخر الجبيل
عبدليٍ يرفع الراس ويعز الخوي

رنج روفر يارفيقي من الوزن الثقيل
الدروب العوج لامر فيها تستوي

منوة اللي ماتذوّق شراب السلسبيل
في ركون البيت من غاب خله منزوي

ايتذكّر راعي الزين والرمش الظليل
الجميل اللي من الزين كله يحتوي

نسل قومٍ تدحم الخصم بالسيف الصقيل
يوم زرق الرمح ويومن سرحان ايعوي

فارقه ربي عن الناس مامثله بديل
لو امتّر هذي الارض واطويها طوي

لو عيني يارفيقي على غيره تخيل
والله ان لا طلّع العين واشويها شوي

مالكٍ قلبي ولا شفت من حبه حصيل
جيته مرتّب ورديت منّه فوضوي

ولا طلبت اني اجيله واشوفه كل ليل
مطلبي من حضرته بس دعمٍ معنوي

وليته ليته يحتضنّي بصدره حيل حيل
او كما قولة هل القاهره اوي اوي

ولا له الا عذب الابيات والشعر الجزيل
والمشاعر في وصوفه تفيض وترتوي

العيون عيون حرٍ مايصداد الهزيل
والشفايف لا حكت تلوي ذراعي لوي

من عرفنا بعض والكل فوق المستحيل
كنّه الاتّي وانا صرت منصور بلوي

ويش اوصّف دام كله على بعضه جميل
المزايا والتواصيف حاويها حوي

ودايم ارددّ لا شفته على الممشى يميل
اقمحي يابنت بولند وبنت الزنكوي

ابك هذا غير ماجاني بطرق الشليل
اشهدنّه منوة القلب وشوق المهتوي

مير له شهرين غايب وانا بالي طويل
والجفا ملعون كوثر وكاويني كوي

دخّن البارود من بعده وشب الفتيل
غايبٍ والصوت يدوي في خفاقي دوي

لو ربي مايفرّق خليلٍ عن خليل
كان ماشفت الهواوي بحالٍ مأسوي

والله اني انطح الجيش واعز الدخيل
بس من شفت الحبيّب وانا ماني قوي