دمعة ملك - حسن علي الهاجري
دمعة ملك ما هي دموع التماسيح
دمعه من اعماق المشاعر نثرها
دمعة ملك تبرا قلوب المجاريح
وامن الحيا يمسح بيدينه أثرها
دمعه تزيح هموم لا يمكن تزيح
تروي ظما طفله وتبعد كدرها
طفله حضنها عطفه وقلب صْحيح
يسأل عليها لين باحت قهرها
وتقول ابويه مات بيد المكاليح
عقبه يتيمه .. ابو متعب ذخرها
هذاك عبدالله بعيد المطاميح
لأجله نصوغ امن المعاني دررها
رجحان عقله نافل كل ترجيح
ولْكلمة التوحيد روحه نذرها
ذخر الوطن يسوى قروم وزحازيح
لأجله ولأجل الشعب عينه سهرها
قلبه به الايمان لا يمكن يطيح
قلب وسع كل البلاد وعمرها
كريم سبلى ضاري بهبّة الريح
مدّات جوده ما يوقّف مطرها
من جاه ضايق راح فرحان ومْريح
وكم كربة بأمره تكاشف ضررها
لاْرهاب عقبه يلطم الخد ويصيح
احزاب شتّتها والاخرى دحرها
اسمه علا فوق السحاب المراويح
نسل الكرام اللي ينومس خبرها
آل السعود اللي غدوا كالمصابيح
اشبارهم ما كل شيخ شبرها
ملوك تسلسل من ملوك مفاليح
والدار تشهد بدوها مَعْ حضرها
رقوا سنام المجد من دون تصريح
وامجادهم ما به كتاب سبرها
اهل الثنا يستاهلون التماديح
بالطيب والمعروف كلّن ذكرها
غصب على الارهاب يبقى الطحاطيح
ولاْحزاب لو تكبر فربّك دمرها
هذي مشاعر ما تبي زود توضيح
من شاعر صاغ البيوت وصخرها