هذي الاعاقه - حسن علي الهاجري
احمل تحياتي لكل المعاقين
الليّ تحدّوا ما بهم من إعاقه
رغم المشقه والصعوبات صلبين
وروح التنافس عندهم والرشاقه
قوم على الشدّات لا يمكن تلين
ويمدّهم ربي بعون وطاقه
ما تنزل هممهم وواحدهم اثنين
ولأجل الكويت الكل درهم نياقه
امشرّفين الدار بين البلادين
والفوز دايم محكمين وثاقه
كم من ميداليه ودرع ونياشين
فازوا بها حرفه وفن وحذاقه
والشعب من كثر الجوايز سعيدين
ولبس الوطن تاجه وشعشع اشراقه
وهذا دأبهم في التنافس قويّين
ولا همهم راع النفاق ونفاقه
وبفخر بهم واقولها للملايين
وبهدي لهم من صافي الود باقه
وبعطر حروفي بمسك ورياحين
واشهد شهادة حق ماهي لفاقه
ذولا عيال الدّار ما فيه ثنتين
اليا احتمى الموقف وضيق نطاقه
الله يوفقهم ويسعدهم سنين
ويبقون في اطار الوفا والصداقه
وكلمه اخيره ما تبي زود تبين
ماهو معاق اللّي شكى قطع ساقه
ترى اعاقه ناقص العقل والدّين
هذي الإعاقه ما وراها إعاقه