صعوط المجانين - سعد برّاك
بيني وبين القاف عرف وميانه
اجمله علي سلوم وقوانين
مدري ضمير الشعر والا لسانه
بس الوكاد اعز راسه ببيتين
يشفي ضرم راسي ويعتز شانه
بنك البنوك موفي الصاع صاعين
مثل الشجيع اللي وسيعٍ بطانه
لافاح صدري مثل فوح البراكين
حييت ياتاج الجزيل وضمانه
اقلط علي مدة خوي الميامين
خلّ الغرور وخلّ درب اللعانه
واضرب صميم العظم ضرب ابو حدين
كلش ولا شعرٍ علي غير خانه
وهروج غيبه في ظهور المقفين
علي النقا مافيه غش وخيانه
لي وجه ماعشت الليالي بوجيهن
عندي عن هروج الملّقف حصانه
ولي من هروج النشاما عناوين
والبارحه بين القسا والليانه
ما طاب لي بالٍ ولا غمضت عين
ياكبرها لاهتز عرش التكانه
ويا زينها وليا خسرت الرديين
ماهمش التاريخ رمز الكنانه
والقدس تبقي عاصمة يا فلسطين
واللي على الزلات يشعب حصانه
ما فاز في وحدة ولا جاب ثنتين
من حاول يجرب علّى الاهانه
بيموت ما نقص مقام العزيزين
آخر زمن حتي ضعيف الديانه
قام يتقدم في جموع المصلين ؟
عان الذي تبغي تهمشه عانه
اليا انذكر يحسب حساب السلاطين
تعيش ياللي ما تزحزح كيانه
افعاله البيضا تغيض الحسودين
قول الحقايق مثل حفظ الأمانه
ونصرة خوى الجنب تحسب كما الدين
وان جبت لي طاري بلاش الرعانه
حذراك من علمٍ بليا براهين
من باب تنزيل الفتي في مكانه
تقدر تسميني صعوط المجانين