ذكرى الماضي - صقر النصافي
ياحيف ياوقت مضى كيف ماعاد
وأنا أتصبر وأرجي إنه يعيدي
أرجيه رجوى راعي الزرع الاحصاد
لا وقف السمبل سوات الهضيدي
ولاني ابناسي حزة حل ميراد
جاني بلا ملقاف قضب بالأيدي
ودنق على ابمبسمه قض الأنهاد
وصديت عن بيض سوات المجيدي
ماهو ابغضله ولاني ابنقاد
الا نهار اصيام في وجه عيدي
حافاني الله عقب قربه بالابعاد
ماشوف منه الا اعلوم المديدي
لو البكا يرجع ابمافات وش عاد
والله لأهل ادموع عيني وأزيدي
مير البكا مافيه زود ولا فاد
يزيد وجعاتي وهو مايفيدي