ياعلي - صقر النصافي
ياعلي خل العيد لأم الدناديش
اللي تنظف كل يومن جسدها
تبغي تماري ناقضات العكاريش
في كل ملفاح تنقض جعدها
العيد عيد الله ولو فات حتيش
من حسبة ايامن يمرك عددها
نبي نعلمك المساري على الجيش
تمشي ذلولك لين يفتر جهدها
خابرك منت بضاري للمطارييش
نبيك تونس حلوها من نكدها
ليله على مسرى وليله مغابيش
وليله نخلي نومها لمن رقدها
وليله على تمره وليله على عيش
وليله نوكلك اللحم صيد يدها
ياعلي لاجيت العرب لاتجي تيش
خبل ليا جاب السوالف سردها
احفظ لسانك لايجي فيه تبطيش
تصبح عيونك كايدات رمدها
يجيك من ينشدك نشدة كديش
يبي يسنع هرجة يعتمدها
خله يقوم مفلت في يده ريش
يروح منك وحاجته ماوجدها
ترى دعابيل الخبول الفوانيش
تبدي بما فيها ولا احد نشدها
يجيك واحد يورش يوريش
سحابته يسبق مطرها بردها
واللي لغقمات السوالف مناقيش
قراية الكلمه على اول عددها
تجي سوالفهم ضحك وتهبيش
وقلوبهم محد يفكك عقدها