الوصيَة - علي مساعد

يا جاهلٍ مر الزمان و حلاته
خذ هاك عقلي ما نفعني و لا أبيه

في هالزمان الطيب أعلن وفاته
الطيب مات و كل طيّب يعزيه

يرحمك يا عودٍ حفظ لك وصاته
يبيك تتبع ساقته ما تخليه

علّمك سيّات الزمن و حسناته
يأمرك بالمعروف ليتك تماشيه

الله وهبنا دين و أحسن صفاته
و أنزل لنا التشريع و أجزل معانيه

الحق و الباطل عرفنا جهاته
و ما يزرع المخلوق له يوم يجنيه

أحدٍ له الدنيا على الكيف جاته
الله عطاه و كل شيٍ بأياديه

ما ذاق لوعات الزمان و شقاته
الفقر و التجويع يسمع بطاريه

و أحدٍ يدوّر في زمانه نجاته
يبي الستر و العافيه بين أهاليه

عزيز نفس و لا يبدّل عباته
راضي و يدري عيشته ما تكفيه

و أحدٍ أبد ماخذ طبايع خواته
ضعيف راي و كلمته ما تجدّيه

و أحدٍ لبس ثوب المراجل بذاته
و أسعد عيون اللي من الضيق ناصيه

و أحدٍ صميدع يرهبك بإلتفاته
حرٍ مطاليعه عن الناس تغنيه

و أحدٍ يضيّع صيدته من عماته
لا واخساره من ترجّى يعشيه

وأحدٍ زرع ما نال غير الحتاته
الحظ كنه واقفٍ له معاديه

و أحد قطف ورد الزمن و ثمراته
باب البخت مفتوح دايم يناديه

و أحدٍ تساوى في حياته مماته
و أحدٍ يموت و طيّب الذكر يحييه

الوقت لو يومي عليك بعصاته
ما هي غريبه منه هذي مماشيه

يا بوي هات اللي يجي منك هاته
راضين باللي ما تكنّه و تخفيه