لا توهميني - علي مساعد
لا توهميني بالوفا لا تحلفين
لا تدعّين إنك نسيتي غرامه
أشوف بعيونك غلا من تحبين
و أحس في نبرات صوتك كلامه
أدري تحبينه و أدري تعانين
و أدري عليك اليوم طوّل خصامه
باسمه تناديني معي دوم تنسين
و غصبٍ عليّ أجاملك بابتسامه
صبرت يمكن في عذابي تحسين
ما ودي أجرح خاطرك بالملامه
لا مرْ زول اللي تبينه تفزين
و يضيع قدري بالهوى و اهتمامه
ايه اتركيني و قولي اللي تقولين
أبحتفظ في عزتي و الكرامه
و لابي وعود و لا عهود و براهين
مابي من الأيام غير السلامه