مسموح - علي مساعد
مسموح لو تكذب عليّه وتخفي
مصدقك في كل شيٍ تقوله
من غير لا تشرح وتطرح وتنفي
في ذمتي ياللي تبيه بتطوله
لا تنحرج وتشب عندي وتطفي
إليا متى فيك الصراحة خجوله
عندك خبر لا صار كفك بكفي
أضيع وأنسى كل شيٍ بأقوله
وياك أحس إني عن الناس منفي
وأهيم بأحلام الهوى والطفوله
قلبي غدى نصفين نصفك ونصفي
عايش معاي العمر عرضه وطوله
إن كان في حقي تماديت معفي
وأيات عذرٍ منك أرضى قبوله
والله ماهو من خضوعي وضعفي
والمشكلة ماهي كذا بالسهوله
المشكلة لي قلب ماهو بصفي
دايم يصدق ما لسانك يقوله