إلا أنتي - علي مساعد
يكبرون بسنهم
إلا انتي تصغرين
يصغرون بكل شي
إلا انتي تكبرين
يا أدفا مني يا أوفا مني سامحيني
لو أكابر وأعترف
أو أقول إن عمرك ما تصيري
أوفا مني
إنتي مثلي . . . إنتي ظلي
تشبهيني بكل شي
و اختلف وياك أنا . . . في كل شي
شفتي هالدنيا . . . صغيره
تشبه عيونك . . . اللي أكبر
من كبيره
تشبه النار اللي تشعل في حشايه
تشبه اسمك
انتي شاسمك . . . يا خطيره
اشربي عمري قبل لا أجف
ويذبل جسمي الناحل
قبل تنسفني أمواجك وأغرق
ويشردني الساحل
في غيابك ابتلش منصور
خالد . . . مبارك . . . حتى بوغزاي
أذيته معاي
و انتي آخر من معاي
في غيابك شعري أوراقي بقايا ذكرياتي
كل شي في البيت
يسألني عليك . . . صوتك
بكل الأماكن أسمعه كل شي والله دوخني عليك
طاوعيني اكذبي وأكذب علشان نعيش صح
تصدقيني لو أقول إن الزمن كله خطا
إلا انتي صح
طاوعيني . . أنا طاوعتك
سنين وجيت لك باللي تبين
كبّري عقلك شويه
وإن صغرتي بعذرك وأقول لا توّك بنيّه
وإن قسيتي أو نسيتي
أو جرحتي خلك بجرحك وفيّه
يكبرون ويصغرون
إلا انتي
بينهم تبقين طفله
مترفه . . حره . . عنيده
وأحلى أكثر من حلاك . . ومن غلاك
ومن هواك . . اللي لعب فيني سنين
بينهم تبقين صوره
مخمليه . . حالمه . . مالها بالكون كون
وفي عيني أحلى .. أحلى ما تكون
ما دريتي . . هذي انتي