عيد الضحية - علي مساعد
إي والله أصبحنا وشفنا التباشير
يا واحدٍ أشرق بعيد الضحيّه
يا مرحبا باللي أشوفه أنا غير
يا بعد من عايد و سلّم عليّه
يا أغلى وعد جابته حلو المقادير
يا آخر اللي ما بقى من بقيّه
من جيتنا أشغلت كل المسايير
كل يهلّي بك و ينسى خويّه
في طلعتك صبّح لك العيد بالخير
و هلّت بك أزهار الصباح النديّه
يالله دخيلك كل ما بك تعابير
غلاك دنيا .. و وصف زينك قضيّه
اللي تهقى ما صار .. لعيونك يصير
أقولها من طيب خاطر و نيّه
تعال توّ العيد شاف التباشير
وتوّي .. دريت اليوم عيد الضحيّه