الطلسمة ! - فيصل العدواني
لا إله الا انت يا رحمن ياواحد احد
واهبٍ نور الهدايه عن دروبٍ مظلمه
باسطٍ سبعٍ وسبعٍ فوقها بليا عمد
فارضٍ خمسٍ عليها العبد نفسه مسلمه
اشهد ان وحدك إلهي ربنا الفرد الصمد
واشهد محمد رسولك والكذوب مسيلمه
واستجير برحمتك يالله من ضيق اللحد
والتجيبك من عذاب القبر واهل المشئمه
واستعيذك يا الاه الكون من حاسد حسد
ومن نفث في عقدته من بعد ذيك الطلسمه
ثم اببدابك الهي راجيٍ منك الرشد
الشعر يغوي وانا غاويه لاجيت انظمه
دام بي فيض المعاني كثر طفاح الزبد
الخطا وارد وانا عبدك ولا اقدر اعصمه
اجتهد وادري بإن ماكل من يجهد ورد
للمصاب اللي يبيه من بعد شدة محزمه
يعني لو صح المثال ان كل من جدا وجدان ماخسر الفتى وخطته كانت محكمه
وكان ماشفنا من اللي فزعته تسوا بلد
نكس ارقبته والا يادوب يجتر انسمه
وقتنا فيه التضاد اشكال واكثرهم نكد
الجلم فيه اذكيا!! ولا الذكي فيه جلمه؟؟
فوضويه عارمه لاما حصوها في عدد
والحقايق خايبه والزيف يرتف علمه
مثل ما شفنا البخيل اليوم للعليا صعد
بكره انشوف الكريم ان مر ذكره نشتمه
البخل ماهو ببخل المال لاشح المدد
البخل باللي تكاثر ضحكةٍ من مبسمه
والجبان اسوء صوره الذل والاسواء بعد
قذف عرض المحصنه يالله لاتبري دمه
والادب ماهو رزانة القاف للي به نشد
كم وكم شاعر يخالف مايدونه اقلمه
ماسلمت..ولاسلم غيري ولو انه جحد
اغلب الشعار تخطي والخطا فينا سمه
كن عيني عن طريق الحق حاديها الرمد
ولو بفكر بالاجابه .. الاجابه مبهمه
وان تجاهلت الحقايق داخلي شيٍ وقد
ما قوى صدري يطيقه ونفسي عيت تهظمه
ان مشت رجلي تبعها..وان قعدت يمي قعد
مدري هو..!!باقي الضمير الحي وأزريت اكتمه
رحمتك يامن ملكت الكون والهمني الرشد
دام يغويني الشعر واغويه لاجيت انظمه
ودام بي فيض المعاني كثر طفاح الزبد
الخطا وارد وانا عبدك ولا اقدر اعصمه