نهر سكر - محمد جارالله السهلي
أمسيه واعلام واضواء وصحافه
وانا لاوقفت مابيني وبيني !
اتساقط ضيق واحباط وحسافه
كني اخنق حلم عمري في يديني !
واتسامى فكر واحساس وثقافه
واكسب التقدير والاعجاب فيني
يا طويل الحزن والواقع خرافه
كذبةٍ ماهيب تسلتطف يقيني !
ليه مااغنيّك تحنان ولطافه ؟
وانت نبض الروح وانفاس تحكيني
ماتهز الريح غصنٍ لارتجافه
ينكسر صوتي ! وتستاحش يميني !
كل مامر المسا صدري وحافه
قلت له والشمس مشرقها جبيني :
من مشت رجله على درب السخافه
طاح من عقلي قبل قلبي وعيني
الرجل لاصار مابه دين : تافه
والعدو لاصار يعجبني : خديني
والفشل لاصرت ترضى بالوصافه
وانت قادر تستبد وتحتويني
وكان انا من لاربط فعله بقافه
جعل تبكيني عيون اللي يبيني
وجه صبحٍ من حياه وعفافه
استحي من طيف زوله لو يجيني
نهر سكر من ضفافه لاضفافه
اغنيات الملح وانشودة حنيني
ناسي النسيان !! طبعه واختلافه
واصبح اللي راح واللي يحتريني
عاشقه .. وقف هنا والعمر طافه
هو متى يرجع وترجع لي سنيني ؟!
الفراق .. شعور من شدة جفافه
يبذر عيوني !! ويقطف دمعتيني !!
القلوب تعاف طاريه وتخافه
يعتريها شئ .. عانه يعتريني :
كلبوي طعون واحزان وكلافه
لاانتهاني جرح الآخر يبتديني
ليت حظي مارمى عمري خلافه
ولا ترك لي تمتمة وينه وويني ؟!
وليت مابيني وبينه من مسافه
مثل مابين السهر وجفون عيني ..