دم رجال أهدرته مره - مدغم ابو شيبه

غابت نجوم السما كلها والله درا
عن وليفٍ دار عامه ويومه وشهره

ياوجودي كل ماطرّف الليل وسرا
ماحدٍ بشّر بشوفه و لاجاب خبره

اليدين أمست من مصافح أيديه فقرا
والعيون اللي فضح دمعها مايستره

أن تذكرته تذكرت دمعٍ ماجرا
قبل مايجمع زهابه على وجه سفره

راكب اللي صمموه لمشايخ وومرا
مابعد حرّك سويكه ولا دار كفره

لو دفع متوسط الدخل دخله ماشرا
له مديليّة مفاتيح والا منظره

رنّة بلوفه اليا فاع من فوق الثرى
كنّها صفق الهبايب على فند شجره

رنج روفر ماقرا لونه اللي ماقرا
افتح من المستكا واغمق من السكره

ان نطحته من قدم وأن قفيته من ورا
كن (سحمان بن ملحم) ملقيك ظهره

الحزام اللي يحزم الظهور الياطرا
طاري الفزعات والكذب مافيه ثمره

في المنافذ والمسارات مايمسك سرى
البلاط يحشمه والرمال تقدره

جرته يمشي على راحته ياهل ترى
شفتها في دقة البشت والا البنجره؟

ياصله ويعلمه وأن درا و ان مادرا
أن قلبي في غيابه معلّق بشعره

لايحسب أنّي نسيت ورب أم القرا
ماتنسا طلع تينه ونفحة عنبره

ايتداركني قبل ضيعتي والا ترا
ضعت ضيعة دم رجالٍ اهدرته مره

لايفكر في برا الجرح والا مابرا
واضح اللي في النعش رايحٍ للمقبره

ويحفظ قدر المحبه ويبقا في حرا
جيّةٍ منّي وغصن الغلا لايكسره

ويخبر اللي في التمادي تطاول و افترا
يكسب المعروف بالعفو عن المقدره

لايجاور وردةٍ في ظلال وفي ذرا
ماسقاها دمع عينه ولا دم نحره

ويش عذره كل ماطرف الليل وسرا
وألتفت أدوّر عيال وأدوّر مره