مسموح يا زول ن مشيت متعدي - مرشد البذال
مسموح يا زول ن مشيت متعدي
حط الذرى بيني وبينه عباته
دوبه بطرف العين يمي يلدي
يبي يسمّح خاطري بالتفاته
قلبي يبي شوفه وعيني تلدي
أخاف من هرج ن يطوله شماته
أخاف من فطنة خطات متحدي
اللي على الغرات هذي سواته
ما ودي إنه يكتشف غيب سدي
خله يروح وعبرته في لهاته
لابد من يوم ن رخاه متمدي
يلحق به القلب المولع شفاته
يوم ن به الحسّيد عنا تصدي
راع الحسد عنا بعيد ن مباته
جعله بدربه ذالفٍ ما يردي
احذف وراء الشيطان سبع حصواته
ياناس بالله لاتصيرون ضدي
من لا هرج بالعدل يكفي سكاته
ياناس مجروح الضمير المودي
خلوه يدله ساعةٍ في حياته
يا صاحبي ماهو بودك وودي
لو ودّنا كل تخيّر مناته
من دون جمعانا سلوم ن تلدي
تمنع شفوق القلب دون شهواته
دونك عدو ن للحسد مستعدي
طعون قلبه بالحشا موجعاته
وإلا فلا غيرك حبيب يسدي
تكفيك ضيقة خاطري وانهتاته
حبك مقيم وحب غيرك يشدي
هذا الكلام اللي صحيح ن ثباته
سلطان حبك لو سيوفه تحدي
جيته مطيع لسايته واحسناته