قال الذي له باشرف الجيل مقدار - مرشد البذال
قال الذي له باشرف الجيل مقدار
من رحمة الخالق على العدل مامور
جيل اليا منه مشى بين الاخيار
شفقوا عليه وقيل راعيه مشكور
مانيب بالمجلس طفوق وهذار
ولانيب من ياخذ كثير اللغى طور
من لا نشدني ماسمع مني اخبار
وليا نشدني راح راغب ومسرور
عندي وعند الناس في كل محضار
السالفه بين الرجاجيل بالدور
واللي يجي بين الرجاجيل ثرثار
يخف وزنه بالمجالس على الفور
هرجه زبد موج لغت فيه الابحار
والا دخن نار تقفاه عافور
والعقل يا صف لك مطاليع الانوار
يظهرك من لجات الاظلام للنور
راعي الذكا والعقل وان صار ما صار
تسمع له الكلمه ويسمع له الشور
واحفظ شرف نفسك عن الذل والعار
اتبع رجال الحق واترك هل الجور
حنا بوقت فيه اجاويد واشرار
تالي زمان بالتواريخ مذكور
شفنا من العادات تغيير وانكار
اخر زمان وكل ناس لهم دور
اليوم كسب الرجل في غض الانظار
ماله ومال الناس عاري ومستور
واحرص على لابعة شريفين الاخيار
ترى الشريف اليوم ماهوب مكثور
اربح بنور تقتبس منه الانوار
ما انتب على لجات الاظلام مجبور
والحق در وياه من حيث ما دار
لا يستريسك بالجهل كل مغرور
قوم حدود الدين خوف من النار
لا تظلم الغافل ولا تشهد الزور
واصبر بحكم الله وما جاء بالاقدار
ترى قوي العزم بالصبر ماجور
ولا تنشر الدعوى على كل مرار
ترى العدو يفرح ليا صرت مضرور
واحرص على ربعه طويلين الاشبار
اللي لهم ذريات الاخلاق دستور
بالك ترابع واحد بالعهد بار
حاذور عن ربعة هل المكر حاذور
وان كنت في غرف الرجاجيل محتار
ترى التجارب تفرق الحصن والثور