قديم الحب - مرشد البذال

أنا يالربع ما ألقى لي بديل
بقلب مانسى حب الخليل

ولو إنه بغى ترك الأمور
رجاه بربعة الغالي طويل

قديم الحب مايمحي غلاه
إلى شفته له الخاطر يميل

تذكرنا ليال ماضيات
بذكر يبعث الجرح الحيول

ربيع القلب هرج مع حبيب
قديم الحب والمنظر جميل

إلى من لجلجن خرس العيون
بغمض يشبك الرمش الظليل

عطا لفتة حياوي شفوق
وتبسم ضحكة ماهي بحيل

على ذاك المشاهد يا سلام
حلاته تنعش القلب العليل

انا شفت المحبه بالبدايه
لها عند اهل العرف تحليل

طبيبين الهوى مايجهلون
مبادى علة القلب العليل

مبادى حبهم فزة قلوب
وضحكات خفيفة وتعزيل

ولو كل كم سده حياه
لزوم واحد منهم يعيل

يبين من الضماير ماكمنه
طريح الحب ماعنده حصيل

إلى من شفت مجروح الفؤاد
نصيحه لا تعرض له سبيل

تحمد ربك اللي مابلاك
لا تشره على القلب العليل

يلومه واحد قلبه سليم
وعنده كل مجبور هبيل

يراقبهم وهو ماله لزوم
تقل هذا على العالم وكيل

يعدل له عقول كاملات
وهو عقله يريد له تعديل

لو انه عاقل ما كان يزري
على راعي المحبة مستحيل

يا ليت من الهوى تخليص شان
ونوى عن محله بالرحيل

فلا حصلت منه الا العذاب
هموم بالنهار وسهر ليل