صاحبي - نواف الدبل
صاحبي؟ ما يضحكك بالجرح غير اعذاره
و انت جرحك لا موتني و لا محييني
و ما يبكي القبر الا لامشوا زوّاره
لا مسحت غبار اخر حفنه بكفيني
ودام ودك تدفن اللي بيننا باسرارهادفنه
ولا انا كيف ادفنه بيديني
يوم انا بانيه من ساسه الين جداره
وكل ذرة ملح في تركيبته تعنيني
لك عليّ اشغّل "السي ديه" بالسيّاره
وابكي ابكي لين اصب القلب من جفنيني
و لك عليّ انسى علوم الوصل بالقطّاره
و لك عليّ اكسر خواطر كل ربعي فيني
ولك عليّ اطر ذكر الخير فيك طراره
ولك عليّ ارضيك لو رضاك ما يرضيني
صاحبي؟ و اللي يحط الطعم بالسناره
احسن انه لو يصرح فيه عينك عيني
ماني مجاوب على نظراتي المحتاره
خلّها و تضيع ما بين المرايه وبيني
خلها تشغل حلوق العالم الثرثاره
ولا انا ما هيب تسمنّي و لا تغنيني
رح فمان الله وجه ابيض و طيب بشاره
لا تراعيني بعينك لين ما تخفيني
واعرف انك لو تلف الارض حاره حاره
وين ما تلقى ملامح طيب بتلاقيني
و اعرف انك لو تضيق بدنيةٍ دوّاره
ما تشوف الا و يدينك وسط يدّيني