انطلاق - نواف الدبل

خلنا نبدا ثلاثه اثنين واحد انطلاق
تنطلق طلقه رصاص ويبتدي مشهد فضيع

تبتدي رحله الم او يبتدي اعظم سباق
شوف كيف اعظم سباق وكيف أهو ماهو سريع

لاكن اعظم شي جاب المركز الاول معاق
يكفي انه دايم الاول على بال الجميع

ادري ان الركض في بعض المواقف حيل شاق
لايهمك شيلها وتجي مع البال الوسيع

يا الاهي حمل ساقين ويشيله بس ساق
ولو يطيع الساق باقي الجسم يمكن مايطيع

شينها لاصرت بين المزري ومالا يطاق
واجتمع دم وعرق ودموع وامال وربيع

اشهد ان الدمع ماهو لا رياء ولا نفاق
والله انه مايديره غير رجال شجيع

ادري ان الفوز لو مابه تعب ماله مذاق
والتعب لولا الصبر ماتم مالا نستطيع

بأذن رب المعجزات اللي على الافاق فاق
العزيز المستجيب الرازق الفرد السميع

اطلب الله يالمعاق ونطلب الله للمعاق
واعرف انك دايم الاول ومنزالك رفيع