سري وللغايه - يوسف الشاطري

سلام الله سلامن قلتها ومخصصٍ متعوب
بعد قلت السلام إسمع خبر عاجل على النيّه

أنا قلبي رهيف وعاشق الخفرات بالمقلوب
ليا شاف الحلا بدل كما شارات ضوئيّه

ليا شاف العيون الناعسات المترفه مصيوب
وركزت النظر فيها أهل علوم سريّه

وحنا أربع رجال وكل واحد صايرٍ مرعوب
تحدي وإن تحداك الرجل تركيله الكيّه

وشفت البنت وعيوني تمنى وأمرها مغلوب
صحيح إني صغير السن لكن عارف الميّه

عليها طلتن مثل الحبيب إليا لقا محبوب
عليها كلمةٍ بالقلب مسموعه ومرئيّه

عليها من الحلا كافي وهي عندي لها مطلوب
تبي كلمه من لساني وأطلع ختم ملكيّه

يضيع الوصف في زينه توصف صوب ولا صوب
مثل بلشت عجوز القوم بسم ريم وريميّه

ولاهي من كزبلنكا وبن غازي ولامن نوب
ولاهي من بلاد النيل ولاهيه بشاميّه

عليها دق ساق وردف خصرٍ من بلاد لعوب
عليها الزين متفصل مصانعها فرنسيّه

بعد مرة على عنتر تبدل حاله لشيبوب
تعقد منطقه وأصبح يدورله على فيّه

بعد راحت على الثاني ولاعنه خبر مكتوب
دروب الحب ماهيله ولاهذي ولاذيّه

وثالثنا بدى يفكر وصحنا يصبر أيوب
وخلاها على شاني وصارت بالعلم ليّه

صحيح إني أقدرهم ولكن ملكها مرغوب
تمناها جميع الخلق من إنسٍ وجنيّه

صحيح إني بزعلهم ولكن ماعليّ عيوب
ولاهمي كلام الناس دام النفس مرضيّه

ترى سري وللغايه خبرعاجل خبر مكذوب
معي أربع بنات وياعرب مشروعنا ميّه