مليون أحبك - أحمد العلوي
مليون أحبك والغلا فوق مليون
ولو ما كفنّك زدنا فيهن ملايين
لله درّك فيك هالقلب مجنون
وياما خلايق فيك صاروا مجانين
ليش العجب؟ مادامك أغنج ومزيون
جدام زينك غابوا كل المزايين
كن الحلا في وجنتك صار مسجون
وإحنا معه صرنا بحبك مساجين
مسكين قلبي فيك يازين مفتون
حَبك ويدري ياما حولك مساكين
وش حال قلب(ن) بالهوى صاح مطعون
لاشاف خله يطمعوا به الملاعين
حب(ن) يجيب الشك والله ملعون
وملعون قلب(ن) يتّبع ناس فاضين
ولولا خفوقك صار في إيدي مضمون
بيضيع فكري من هجوس الشياطين
حبك مع الإخلاص بالقلب مدفون
والحب جنه لاغدوا الناس وافيين
ولو ضاع حب(ن) بالمعاليق مكنون
بدعي بموتي وليتك تقول آمين
الموت أرحم من تناهيد محزون
والشوق جمره والمفارق براكين
واللي يحب بيظل للحب مديون
الحب قهوة والخوافق فناجين
مهما حصل يبقى الأثر فيها مخزون
مثل الأريج اللي بقى م الرياحين
ومادام قلبي للهوى صار مرهون
وشلون تطلب للمحبه براهين؟
برهاني إني فيك بالحيل مجنون
ولاشك إني فيك أغبى المجانين
لكن تأكد لو يحبوك مليون
ببقى أنا أوفى جميع الملايين