يا لابسه الصوري - أحمد العلوي
أنا لامن ذكرت إسمك ، يذوّبني الوله شمعه
ويذبل ف المدى دربي ، وتكرهني مسافاتي
فديتك..ماعدا هجرك ، وش اللي يجبر الدمعه
جفاك اللي علي يفرض ، أبالغ في معاناتي
عرفتيني وفي يرفض ، يبدّل بالجفا طبعه
أموت ولا يموت الصدق والإخلاص في ذاتي
أنا متوسد أحلامي ، وباني ف الهوى قلعه
حواليها بساتين الغلا تزهر من أبياتي
تخيلتك أميرتها ، وقلت: ((الله))..وبسرعه
غفت عيني على حلم(ن) تحقق في خيالاتي
يمر موقف على بالي ، حدث في ليلة الجمعه
وصرت أسترجعه دايم ، في روحاتي وجيّاتي
خطفتي لابسه صوري ، وثوب مزركش و جبعه
وجيتي بالدلع تمشي ، وطارت فيك نظراتي
تبسّمتي ، وكن الليل ، قطف من فتنتك قطعه
وصار الليل بك أحلى ، وصرت أهديك بسماتي
تبادلنا الحكي نظرات ، والأعماق متولعه
وعينك بالخجل ترجف ، وعيني تقول:(لاتحاتي)
مدام الحب يجمعنا ويجمعنا دفا شرعه
أبد لاينجرح قلبك ، ولايرتاب..مولاتي
ترى شاعر غلاك إنسان ، كريم وطيّب السمعه
وش العيب إن غدى حبك وقربك أسمى رغباتي
حلا بك ثوبك الصوري ، وربي ي الغلا وجعه
أصيح الآه من حسنك ، وتستحلين آهاتي
جمالك في دلالك والدلع بك متعه وروعه
لذيذه لذّة السكر ، إلى من ذاب ف شفاتي
ذهب يلبس ذهب..وشلون؟ ترى والله مو بدعه
أشوف البنجري فيدك ، يترجم حال لهفاتي
وه المرتشحه في نحرك ، خذت من وجنتك لمعه
وه المرّيه تزهى بك وتزهى بك حكاياتي
ونقش الحنا في إيديك ، يزيد السالفه متعه
تجمّع فيك كل الزين وزينك صار راحاتي
سحرتيني ي صوريه ، وقلبي إنقلب وضعه
على هونك ، أنا ف الحب ، تراني في بداياتي
حرام الصد يابنت الكرام وخابرك سنعه
حريصه ، ماتحبين الغلط واللي معه ياتي
فديتك..ماعدا هجرك ، ولاشي يجبر الدمعه
أنا لامن تجافيني ، أقاسي في معاناتي
مدام إسمك إذا مرني ، يذوّبني الوله شمعه
ويذبل ف المدى دربي ، وتكرهني مسافاتي
معاني الكلمات:
الجبعه: هي عباءة المرأه. أو الوشاح الذي تتوشح به
وجعه: مفرده مستحدثه في الهجة الصوريه الدارجه ، وتعني في أغلب الأحيان مميز ، أو شئ رائع.
البنجري: سوار ذهب صوري ، وهو من القطع المشهوره في الذهب الصوري ويأتي عريض الشكل وبه نهايات على شكل قرون.
المرتشحه: أيضا قطعة ذهب صوريه شهيره ، وكانت أغلب النساء الصوريات يمتلكنها ، لأنها ذات قيمه معنويه أكثر منها ماديه عند النساء. وتلبس حول العنق.
المرّيه:وتسمّى في صور مرّية أم حرز وهي قطعه ذهبيه صوريه ، وأيضا مشهوره.