عشق صافي - أيوب السعدي
على مهلك قبل يصحى أو إنه يحس أو يدري
وش اللي يفكني منه أبوك إنسان ثرثاري
لو إنه شافني لحظة أو إنه يعلم بأمري
حدر سكينه العوجا علي وخالف أقداري
وأنا توني عشق صافي تناثر ف الهوى بدري
بداية ترسم عيونك أمامي والأمل جاري
على خدك بدر ضاوي يطوف بنوره ويسري
وعلى شف الثغر بسمه تنادي غيمة أشعاري
أنا اللي كلما شفتك أموت بخدك السحري
وأنا اللي ألتفت صوبك ولا ابعد عنك أنظاري
وأنا اللي أرسمك صورة بديعة في حشى صدري
وأنا اللي أسهر بعينك وأنا اللي جيت ع الطاري
غرست بداخلك ورده نزفت بدمك العطري
زرعت بعينك السكر نقشت بوجهك العاري
عزفت بجوك ألحاني همست بأذنك الزهري
ولمحت الصوت يتردد بدت ترقص له أزهاري
كذا أقدر أقول إني ملكتك يا بعد عمري
كحل عينك مع النظره ملامح وجهك أسراري
بدايه أختصر فيها بجملة وانتهي بدري
مدام إنك هويتيني عرفتي اشلون تختاري