غياب - حسن الرواس
مع كل الوجع في داخلي ياعارفه لاوين ؟
كأنَهْ ما يهمك لوعة الهجران وحنينه
تصدِّين الوداد اللي جمع بالعاطفه قلبين
وتنسي في عنادك حلم واعد كيف تنسينه؟
تيمم بعد وعدك من عفاف الطهر لو تدرين
ويمم للقاء قبل المعاد ولارجع وينه ؟
خذتهُ الأُمنيات اللي توارت في الجفا والبين
ذبل غصن المشاعر والأمل جفَّت بساتينه
تعالي نقطع أسباب الغياب ونقسمه نصفين
تعالي نجمع أطراف الوداد ولا تصدَّينه
سكني البعد وأطيافك معي ما فارقتها العين
ترى لازال قلبي بالوله تنبض شرايينه
ترى وهج الغرام اللي أضمَّه مااْنطفأ للحين
أمانه لو تردِّي ياغلا روحي وتروينه
تعالي قرّبي نصف المسافه والعتب بعدين
ربيع العمر من عطر التلاقي تزهر سنينه