ماتت دموعي - سيف بن سليمان
يا صاحبي ولا اقلك... بلاها
من دون يا صاحب، تعرف السلام؟
انته وانته وانت وانته، نهاها
يعني كذا تفتح حديث وكلام؟
لو قلت انّك مع بلاهة وسفاها
تجمع خصال الامعة ف الغلام
يمكن اظلمك وانت تفرح علاها
تفرح لك الناس، وتعلّق وسام
كلٍّ يعرف ان الرجولة نباها
في حزة الموقف تبين وتسام
من عند رجلٍ تعتزيه وشراها
ماتهلّ دمعاته بدون اهتمام
الله حسيبه ما قدرنا نراها
ولاّ حكمها بالمحاجر حرام؟
لوني سألت الناس: منهو رماها؟
يمكن تجيب: بشوق، عشق وغرام
واللي ذرفها خوف، واللي تباها
كلّ الليالي دون سبّة وانام
واللي ذرفها من طروب وغناها
واللي ذرفها فاقِد اهلٍ كرام
واللي ذرفها قبل كذبه ونساها
واللي ذرفها في بلوغ المرام
واللي ذرفها في صلاته وخفاها
واللي ذرفها مخطِيِ وْفي ندام
واللي ذرفها في وصيّة وصاها
واللي ذرفها خفّ عقله المدام
لو قيل لك: يا (سيف)، دفّق كلاها
وش هي السبايب، ولاّ وش هو المقام
كان الجواب ارفع عيوني سماها
يوم الخلايق بالليالي نيام
الله حسيبي ما قدرنا ثناها
لو كانت دموعي كوبل الغمام
احمده لانه ملهمنّي تقاها
وسأله عن شوف الفواحش صيام
ولاّ لغير الله وقّفت ماها
اعدم عليها، لو ع دمّي عدام
ماتت دموعي دون ماحضر عزاها
عزّيتها من قبل شوف الانام
ياعظم رجلٍ قال كلمة قراها
من دون لا يحلف ويكثر قسام
اعذب قوافي الشعر يضرب صداها
في صدقها، كل من قراها استهام