حماد - ناصر الهاشمي
هلا يا فرحة فواد توجد في رجاك شهور
واذرفت الدمع مالعين يوم الفيت يالغالي
هلا بك عد ما تسجع وما حنت حمام الدور
هلا يا منية قليبي وكل ارجاي وآمالي
صرختك للحياة اشراقة لي واعتبرها نور
وريحة مهدك الكاذي نفحها ورد وهالي
سميك يا نسل الاخيار عزيز فارس مشهور
على حماد سميتك رجل من عد لرجالي
عساك لديرتك حامي وعن اهلك ترد الجور
وعن كل المناقص ترتفع وتكون في العالي
ترى اهل الشهامة يا ولدي لي فعلهم مذكور
وما ينفع نزول الراس عزوة جد وخالي
واوصيك الكرم يا عزوتي والصدق لي مأثور
وما يذكر بخيل لو تعلى وطاول اجبالي
ولا تركن مع الظالم غضب ربك عليك يدور
والله يمهل الظالم ولا يهمله مثقالي
واوصيك التواضع والحلم لي يجعلك مسرور
ولا تخون الامانة والصديق اعفيه لو مالي
طلبتك ربي المولى بطه والقلم والنور
تحرسه من عدى الكايد وعنه ابليس ينزالي