أهل الرايه - حمد بن عبدالله بن حذيف النعيمي

قبل الشهر يدخل ونلبس ثوبه
يارب عفوك والورع والتوبه

اغفر ذنوب العبد واستر عيبه
وياكبر كسبه لغفرت اذنوبه

وبارك لمن يقرا القصيد وهنّه
واللي تسمّع نوّله مطلوبه

وبارك بشهر الخير لأفضل امه
امة محمد واهدها لدروبه

واجعل لها قيمه وشان وهيبه
لا تستوي بين الأمم مسلوبه

عدها الى نهج السلف وابعدها
عن عنصرية جنس واسم عروبه

وحقق لقادتها دروب العزه
ومن عزة الأسلام عز شعوبه

وارفع لها في كل محفل رايه
تبقى على طول الزمن منصوبه

بالدين والحكمه وعدل المنطق
واقوالها بافعالها مصحوبه

للسيف واهل الخيل واهل الرايه
تاريخ حافل سيرته مكتوبه

ويالله تظهر من عبادك واحد
يجمع شتات الأمه المنكوبه

ولا تولّي امرها لمراوي
ولا الذي سدّه على عرقوبه

ولا ضحاح وهيبته بالشيفه
سراب ما يروي الظما مشروبه

ولا الذي قوله يخالف فعله
عند النوايب ينكشف عذروبه

واللي على غير الشريعه نهجه
لا تبتلينا من وراه الحوبه

ساء الزمن ولا الإساءه فينا
كل ٍ على وقته يقط عيوبه

حتى مع الخير الكثير الوافر
كن النعم من بيننا مسحوبه

لا نحمد النعمه ولا نشكرها
والنفس بافعال الحسد مضروبه

انكذب الصادق ويصدق كاذب
والنار تبقى بيننا مشبوبه

ونبحث عن العدله بفكرة ماي
لاللي يضبطها بحلو اسلوبه

صور كثيره في بقاع العالم
تظهر لنا عدله وهي مقلوبه

تعما البصاير في عيون ٍ تبصر
ولا الإراده كنّها مشطوبه

ادخل على الله وش حصل بالدنيا
كن العباد بدينها مغصوبه

حتى صيام الشهر اصبح واجب
مربوط بامساكه ووقت غروبه

واللي بقى يارب تنزل رحمه
نعمه من افضالك لنا موهوبه

وتبدل الحال السقيم المزري
قادر ولا فيها عليك اصعوبه

افتح لنا باب السما وامطرنا
طهر بماك ارواحنا المحسوبه

ما دامنا نسجد لوجهك طاعه
ثب النوايا المخلصه بالتوبه