ما تذرف الدمع عين - حمد بن عبدالله بن حذيف النعيمي

مافيه داعي للعتب كان بتروح
اقطع حبال الوصل بينك وبيني

ياكثر ما عانيت من قربك جروح
لهذا السبب ما تذرف الدمع عيني

لا تحسب اني عقب فرقاك مذبوح
لا والله الا حي والروح فيني

الله يعلم من على البعد بينوح
ومن يفقد الثاني ويمسي حزيني

من قلت لي ذا العلم والصدر مشروح
وكن السعاده توها تحتويني

ياكثر ما ضحيت من دون مصلوح
راحت خساره فيك يالمستهيني

لشك لعيونك يابو صوت مبحوح
سيف الشعر يقطع غرام ٍ سميني

ولعيون من يرفع على ساسك صروح
شوف القصر كانه لعينك يبيني

اذرف بقايا الدمع مسموح مسموح
تبكي وانا ودعت ليل الونيني

وش عاد لو فيها شماتات وكسوح
اضرب برجلك الأرض يمكن تليني

بيرق غرامك اصبح اليوم مطروح
وبيرق غرامي مرتفع في يميني

البارحه ليلي سواليف ومزوح
في مجلسي واحباب قلبي تجيني

هاذي هي الدنيا تجي يوم وتروح
ماحد ملكها دوم طول السنيني