غرب الرفاع - حمد بن عبدالله بن حذيف النعيمي
ودعت داري امس ضايق ومخنوق
تدرين هاللحظات دايم حزينه
حتى العزم مابين عاجل ومفهوق
فرقى قطر بالعون صعبه وشينه
احس كن بداخلي شي مسروق
جيت وبقى قلبي معاها رهينه
لا شك يالبحرين من جاك مرفوق
يرجع خفوقه ويتجدد حنينه
جيتك على ذكرى قديمه مع شوق
جيتك غلا بانت بوجهي سنينه
قولي هلا يهتز بالجوف معلوق
قلت السلام ارجوك لا تسفهينه
بذاك المسا ماني بسايح على السوق
تكليف والمبعوث ربي يعينه
والصبح داعبني الهوا ساعة شروق
غرب الرفاع وقبل جسر المدينه
واشملت ثم شرقت والدرب مطروق
لمحرقك والقلب ارسى سفينه
هواك خلاني مع الناس مرموق
وانتي يانور العين دره ثمينه
ياكثر من حبك وحُبك لمخلوق
للي وفا لك واسكنك وسط عينه
عهد الرخا عهده وله عندك حقوق
هذا الذي يبغيك وانتي تبينه
كساك ثوب الملك ولقدك يلوق
وغذاك من فكره وصرتي ذهينه
هذا الخليفي نظرنه دايما فوق
هذا حمد وانتي بعهده امينه
النادر اللي لعطا العهد موثوق
بشت الولا فوق الوفا تلبسينه
سلام له مالاح في جوك بروق
وان طاح في هذا الثرى تشربينه
وسلام ماحرك هوا عصير زملوق
بروض ٍ يسر النفس من كثر زينه
وسلام له من صافي القلب مدفوق
مع عبير الشوق صافح يمينه
جيتك وانا مسروق وباروح مسروق
قلبي غدا قسمين بينك وبينه
لقيت قيك الطيب ياقمة الذوق
من قال يالبحرين ماتفتنينه