حاجة خصوصي - حمد بن عبدالله بن حذيف النعيمي
لا تعتذر وتزيّد الطين بله
تبغي سحاب العشق يسقي اراضيك
ماهو انا اللي انت تقدر تذله
لا عاد تسألني ولا تقول وش فيك
وماهي مجرد مزح او صغر زله
الا خطا عن عمد وابليس مغويك
سيفك على غيري بكيفك تسله
اما انا بقطع بصدي امانيك
رح بالطريق اللي تبيه وتدله
بارت بك ايامك وبارت لياليك
انت الذي حطيت بالقلب عله
امرضت قلب ٍ كان بالأمس مغليك
ما همني لو قلت انا الذوق كله
وش فايده قولك يخالف معانيك
النفس عن بعض الغلا مستقله
لصار باقي عشرتك في تغليك
لا تمتحن قلبٍ تفيأت ظله
ما تذكر انّه كان في يوم يأويك
نجمك هوا ياصاحبي من محله
ومن خارطة مسراي طاحت مجاريك
ماهي معاني شاعر ٍ عاف خله
من واقعك خذت المعاني وبعطيك
وماظن قلب الشوق حن وتوله
الا القصيده في غيابي تعزيك
حاجه خصوصي مثبته بالأدله
خذها صريحه ما بها أي تشكيك
قولي اذا قلته يجي في محله
ورٌد شعورك واشرب اللي يكفيك