اطباع الأحباب - حمد بن عبدالله بن حذيف النعيمي
احب فيك أطباع واكره بك أطباع
والشين يصبح زين مادمت غالي
يا كثر ما بينت لك عدل الاسناع
ويا كثر ما طبعك عن العدل مالي
النفس ما ترضى على كل الأوضاع
يا هونها نفسن ترب التوالي
طبع الخطا يظهر ولو ما بعد شاع
ما يستتر في ثوب سود الليالي
ما كل شخص ياكل الزاد وان جاع
واللي بدالك بالهوى ما بدالي
لا تحسب اني في هوى الغير طماع
ما رحت ادوّر عنه والقلب خالي
عزاي فيك انك عن الغير مناع
لا واحسافة كان تجهل بحالي
اسرار ما ودي على الناس تنذاع
لا شك كبر الهم ضيق مجالي
ان كان هو مقسوم ما ني بجزاع
على رجا ربي رميت احتمالي
وان شفتني في بعض الاحيان منصاع
تقفي بي الفكرة ويسرح خيالي
احب اناظر بالفضا واطوي القاع
وارسم بشعري من همومي تسالي