هاك الشعر - حمد بن عبدالله بن حذيف النعيمي

اهلا هلا حييت ياسيد الحور
تدري انا قلبي وله واتمناك

ودي بشوفك لو حصل كنت مسرور
ولا المسج همسة وصل يوم هو جاك

ان كان صوتك يبري الجرح معذور
معذور منهو قال ياسيدي هاك

هاك الخفوق اللي من الصد مكسور
هاك الدموع اللي على البعد تنخاك

هاك الشعر مادام هو فيك مجبور
نزف المعاني يا اكحل العين يهناك

أبني على نهرك من اشعاري جسور
واعبر على جسر الشعر صوب ميناك

بعض الصدف فيها من الخير مذكور
وابركها من ساعه اذا جات وياك

ساس المحبه بالوفا يرفع قصور
وانا الوفا طبعي اذا كان مبداك

تبغي قصيده بس امر على الفور
له الشرف شعري اذا طال يمناك

قبلك من الضيقات في قلبي بحور
وجيت وغرفت هموم قلبي بلقياك

الله عطاك ان جيت في طلتك نور
والله عطاك وزاد في طيب معناك

والله عطاني منك ميعاد وحضور
ساعه وتسوى بالثمن كنز الأفلاك

سلام ياليل ٍعلى الوجه منثور
اغار لحركت راسك وغطاك

خل الجمال الفذ في عيني ايدور
لا تحرم المشتاق شوفة محيّاك

اقول كل الزين بالعين محصور
واذا جمعتك تستوي كلك احلاك

ميّاس عودك خمري اللون مزرور
من ضيق ملبوسك على القد يزهاك