ياحروف الشعر - حمد بن عبدالله بن حذيف النعيمي
ياحروف الشعر هيا البسي ثوب الخطابه
واستعدي بالمعاني وعطري روح القصيده
واجبي حان ودعاني والهدايا ماتشابه
قمت فيهن اتخير وانتقي منهن فريده
للغلا شيخه هديه زهرة العمر وشبابه
والغلا كله لشيخه كنها خلقت وحيده
بالجمال الله عطاها والحلا فيها مهابه
في وداعتها ليان وفي تعاملها رشيده
عندها للعقل ميزه حاضره لو في غيابه
كن ربي ما خلقها طين من بدّة عبيده
في معانيها سمو وفي سوالفها دعابه
كنها تمسي بروح وتصبح بروح جديده
ومن تحرا بالمزايا شافها مثل السحابه
من يظن انه لقاها شافها عنه بعيده
قلت بهدي شي توه خاطري والشعر جابه
يا عسى شيخه تهنّا جعلها دايم سعيده