ربيع المشاعر - حمد بن عبدالله بن حذيف النعيمي
ياربيع المشاعر جيت قبل الربيع
يسعد الله صباحك يا شبيه الغزال
ساكن القلب مبطي ما قعدنا جميع
غير طيفك يجيبه حلم ولا خيال
الحق اللي تبقا بالعمر لا يضيع
حسبة ايام تمضي والعمر للزوال
الغلا ما شريته يوم غيرك يبيع
يقطع الله محبه كنها سوق مال
البطا زاد شوقي واحسبك ما تطيع
عزة النفس ترفض والكبر والدلال
انفتح باب قلبي واستوا لك وسيع
وانحدر سيل شعري من رفيع الجبال
القصيده ذلولي سقتها لك سريع
اقبل اللي عليها عاني من شمال
كان هذا غرامك يالصباح البديع
اعذر اللي تطفل بالمعاني وقال