صورة لها رب المخاليق زيّن - حمد بن فطيس

ياطير حظ اللي لمثلك يعيّن
من دون عقلانك تتالت اوجابك

غريّت بك واثر السبب كان هيّن
انقص فجأه من رداه وغدا بك

واوما جناحك يطلع الجو ليّن
وطير ٍ يشوف امسوح ريشك يهابك

من جاب مثلك ما خسر لو تديّن
لا سامك اللي رافع ٍ فتح بابك

مافيه شي ٍ من وصوفك يشيّن
شكلك ..والى جاك الزبون التوا بك

ماريّتك فعل ٍ على الوجه بيّن
اما وسم .. والا نتيجة مشابك

صوره لها رب المخاليق زيّن
تاقف على ارض ٍ سوّرتها حرابك

الله يحطك في نصد كل ديّن
اللي تسوقه شيمته لين جابك

قرم ٍ على اسمي في الشريحه تبيّن
قد ذاق لوعات الضياع ولفا بك

يامااطيّبه من هو لمثلك يعيّن
دوّر لرقمي في (قطر) لين جابك