بعض الأوقات - حمد بن فطيس
اعرف بعض الأوقات لا سرت مشغول
واعرف بعض لوقات لا سرت فاضي
دنيا مهي تبقى بحالٍ على طول
كن حن بهاا على قضيّا مقاضي
من جاا يعدل ميلهاا قيل مهبول
لعبة ورق فيهاا المسيطر يغاضي
الزور يقلب حق والحق مجهول
والحق ما منه ملاذ وتغاضي
كثر النفاق.. ودار حولٍ بثر حول
ماكن كثر البلبله حكي فاضي
ومن لا توقى في الرماضي بزربول
يحرق سماريّه مسير الرماضي
(وارويبضه) لوقال ما هو بمسؤول
قبل امس ما يسأل وذالحين قاضي
خضت البحر وانا اتحاشا عن الدووول
خوف الهلامي يلحق الساق شاضي
البايع الشاري مع الناس مقبول
بيع وشرا عاادي.. قبول وتراضي
الى اجتمع مرهي وشاعر ومخبول؟
خلطة ادب فاشل تثير امتعاضي
تشرى الذمم واتباع بالعرض والطول
والكل ينظرهاا بعينه وراضي
المال خلاّ غير معقول؟ معقوول
ماالوم نجم الاغنيّه قام ياضي
ياللاسف.. ما كل منقول مقبوول
ثوبٍ مشجّر جنّب ثوبٍ ابيااضي
قلته وانا بالفعل برهنت ماا..اقول
وعلى جباا الريان تنسف احياضي
وعن ما حصل للشعر ماني بمسؤول
ما دامني مبدي عليه اعتراضي