يا بو خلف - حمد بن فطيس
يابو خلف تطري على البال دايم
والى طريت اقول مسيك بالخير
يالنادر اللي ما جلب له علايم
(اشقر وروس اطراف ريشه مغاتير)
اخذت لي مده عن الشعر صايم
وافطرت في مدحك ووصفك على الطير
الكل منكم محريٍ بالغنايم
وجه التشابه بينكم خدمة الغير
ياريف ربعك ياقوي العزايم
تقصر عن افعالك جزال التعابير
وافي وقدرك من ورى كل حايم
للخير في وجهك دلاله وتعبير
تشري عزومك لا وقف كل سايم
وقفاتك اشهر من جميع المشاهير
لك وقفتٍ ما تعترف بالهزايم
لاوقفها عنتر ولا سالم الزيز
يفدونك اللي ينقلون النمايم
هراجة المجلس ونفاخة الكير
دعيتنا جعلك على العز دايم
وحنّا على شانك قطعنا المشاوير