يابو عوجان - حمد بن فطيس
يايوجودي ياوجودي عليهم ياسعيد
وجد من هو ضاع طيره على خاطي خريش
يحسب انه يوم هده يبي عنده يصيد
والعهد به يوم قفى وفي الكفين ريش
اتناسا العشق الاول واعوّد من جديد
عزتي للي على اذكار ما ضيّه يعيش
الحضاره يابو عوجان خلتني وحيد
اكره الروتين واختار لي قاعٍ وحيش
عن سنعها هي واهلها عسى داري بعيد
حي ممساً في البراحه ومقيال العريش
الزمن ما فيه حيله وحيله ما يبيد
لو صفى في بعض الايام في الاخرى غشيش
والله اني بي حميّه وضلعي من حديد
واتحمل بعد الاحباب لوقدني نشيش
بالعزيمه بعد الايمان والصبر الحميد
اتحدى الهم لو كان في صدري يجيش
ول يا حلمٍ بنيته بعد جهد جهيد
اندفق كنّه حليبٍ من ابريقه يطيش
اوهموني بالحقيقه وصدّاق الوعيد
لين ذعذاع السمايم قلب لون الحشيش
والبدو يومين قامه ويومينٍ شديد
هكذا ننزل ونرحل وغيره ما نبيش
لو كسبته ما حسب اني كسبت ام الحديد
ماكسبت اقلاعة الخيل من عند الدويش