في المختلف - راشد بن محمد بن جعيثن

لي ناظر من شوف غيرك حرمته
ماغير أناظر عن عيون العرب فوق

فيك القصيد اللي غريب نظمته
وغنا به اللي ذايق مثل ما أذوق

وش قلت؟في حب عظيم كتمته
عشرين حول مادرى عنه مخلوق

مظلوم حب وأنته اللي ظلمته
سجين رغبات من الناس مطلوق

لو الشقا بيني وبينك قسمته
قاسيت ماقاسيت من ثاير الشوق

وأما جرحت القلب والا رحمته
وإلا جهلت أسرار عاشق ومعشوق

وحب تجاوز ماتصور هدمته
وأصبحت كني من على الوجه مصفوق

وفي المختلف حد اختلافي حسمته
لك أنت مهما كان مايمكن أتوق

وأخر كلامي ياهوى البال دمته
غالي وعندك بالهوى مالي أوفوق