القابله - صالح آل مانعه
اقل من مره تقابلنا وأقل من القليل
واكثر من مية مره اسمع صوتها وارتابله
بنت الرجال اللي نهار الهوش يشفون الغليل
وأم العيون اللي تهد الجيش يوم تقابله
عريبة المنسب من الجدين مروين الصقيل
وبنتٍ لفارس قومه اللي يحسبون حسابله
فيها ثلاث اشياء ماهي عند نقاضة جديل
عقل وجمال وعفةٍ تسوى البلاد النابله
عشقتها قدلي ثلاث سنين والقلب العليل
عيا يطيع الوقت والوقت الردي ماطابله
حتى غدت ليام في عيني سناها مثل ليل
والليل مثل الليل وعشرٍ مثلها متدابله
حاولت اصفيها ولكن كيف حل المستحيل
دام الزمان اقشر وقلب اللي عشق ماتابله
سارت عنادٍ بين شين الحظ والوقت البخيل
وانا ضحية من لعب بالقلب حتى جابله
اجمل بيوت الشعر واصدقها معاني والدليل
اني ليا غنيت قام الشعر يمطر وابله
الين هبل بي وانا قبل اعرفه ماني هبيل
وانكان جاه هبال يارب اني اللي هابله
اكتب بيوت الشعر من شانه على البحر الطويل
واثر القصيد الجزل وبحور القصيد احبابله!!!
عطيته من العشق مالا يعرفه ناسي جميل
حتى نحل جسمي من اسبابه وراسي شابله
قد خيروها وحلفت بالله ماترضى بديل
وانا بعد لو خيروني غيرها ماناب له
القلب مشقيه الوله والمبتلي عابر سبيل
والنفس من طعم الكرا والقوت ماهي قابله
امسي على رجواي واصبح والحصيل هو الحصيل
حلمٍ جلاه الصبح وارواني عطش لمقابله
في كل يوم اقول بكره يجتمع خل وخليل
واشوف بكره كنه خوانه واقول القابله
والقابله ماجات وانا تهت لو عقلي دليل
مانيب اهاب الدرب لكن الزمان انصابله
والى متى وانا على ذا الحال وعيوني تخيل
والحظ من يوم وقفت رجليه وانا اعابله
اما حبى فترين ولا طاح له فاقرب مقيل!!
ولا قعد كنه يغايضني غصونه ذابله
ياشيخة الخفرات ياجمل حس يالوزن الثقيل
ترا عذابك ياعذابه ماصفى المشراب له
حاول على لاماك لكن خانه القلب العليل
عيا يطيع الوقت والوقت الردي ماطابله